Vizitë studimore USKEB - Komisioni Bullgaro-Amerikan për Shkëmbimin Arsimor (Komisioni Fulbright i Bullgarisë)
Delegacioni i Kosovës me ekipin e Fulbright Bullgarisë dhe anëtarët e bordit
26-27 Prill 2023 - Bordi i Shkëmbimit Arsimor Shtetet e Bashkuara-Kosovë (USKEB), përfaqësues të Ambasadës së SHBA-së në Kosovë dhe të Këshillit Amerikan në Kosovë, morën pjesë në një vizitë studimore në Komisionin Bullgaro-Amerikan për Shkëmbimin Arsimor (Komisioni Fulbright i Bullgarisë) në Sofje, Bullgari. Qëllimi i vizitës studimore ishte shkëmbimi i njohurive, përvojave dhe nxitja e partneriteteve rajonale.
Vizita filloi me mirëseardhjen e delegacionit kosovar nga ekipi i Komisionit Fulbright të Bullgarisë, i udhëhequr nga Drejtoresha Ekzekutive, Angela Rodel dhe anëtarët e bordit. Takimi filloi me një diskutim gjithëpërfshirës mbi strukturën organizative të Komisionit Fulbright, për të vazhduar me një pasqyrë të aktiviteteve dhe nismave të tij të shumta. Për më tepër, anëtarët e bordit të Komisionit Fulbright shtjelluan përgjegjësitë e tyre lidhur me vizionin e Komisionit drejt arritjes së objektivave të tij strategjike.
Më pas, USKEB pati shans për të ndarë përvojat e tyre si anëtarë të bordit të këtij modeli inovativ, së bashku me rolin e tyre përballë programeve të shumta. Diskutimi u thellua në ndarjen e praktikave më të mira në lidhje me programet e ndryshme dhe faktorët që merren parasysh gjatë proceseve të përzgjedhjes, duke theksuar qëllimin e përbashkët të angazhimit të palëkundur për transparencë, drejtësi dhe barazi.
Në pasdite, delegacioni i Kosovës mori pjesë në një pritje në Këndin Amerikan në Sofje, ku patën rastin të lidhen me anëtarët e bordit të Fulbright Bulgaria, një grup ish-studentësh të shquar nga fusha të ndryshme, si dhe ambasadorin e Kosovës në Bullgari, Delfin Pllana.
Delegacioni i Kosovës me ekipin e Fulbright Bullgarisë, anëtarët e bordit, alumni dhe ambasadorin e Kosovës në Bullgari në Këndin Amerikan në Sofje
Dita e parë e vizitës u përmbyll me një darkë të këndshme të organizuar nga biznesmeni i shquar shqiptaro-bullgar, Elvin Guri, me të ftuar ambasadorin Pllana dhe ambasadoren e Shqipërisë në Bullgari, Donika Hoxha. Kjo ishte një mundësi për anëtarët e USKEB-it të bashkëbisedojnë rreth promovimit të rritjes dhe zhvillimit ekonomik në rajon përmes mundësive të shkëmbimit arsimor.
Dita e dytë e vizitës filloi me një udhëtim në Manastirin e Rilës, simbol i Rilindjes Bullgare të shekullit të 19-të. Vizita vazhdoi në Universitetin Amerikan në Bullgari, ku delegacioni i Kosovës u prit ngrohtësisht nga dekanët, pedagogët dhe studentët. Të ftuarit u angazhuan në pasurimin e bisedave me komunitetin universitar, duke u njohur me përvojat akademike dhe kulturore të ofruara nga ky institucion. Pika kryesore e ditës ishte një tryezë e rrumbullakët me temë "Sfidat dhe mundësitë për shkëmbimin ndërkombëtar arsimor në Evropën Juglindore", ku në diskutim morën pjesë edhe anëtarët e USKEB-it, Dajana Berisha dhe Prof. Dr. Kreshnik Hoti.
Ky udhëtim studimor përfundoi me një vizitë në Ambasadën e Kosovës në Bullgari, ku delegacioni kosovar diskutoi rëndësinë e nxitjes së iniciativave rajonale përmes aktiviteteve të ndryshme arsimore dhe kulturore.
Bordi i Shkëmbimit Arsimor Shtetet e Bashkuara-Kosovë (USKEB) është një bord këshillues jo-juridik, i themeluar me qëllim të rritjes së mirëkuptimit të ndërsjellë dhe avancimit të marrëdhënieve ndërmjet njerëzve të Shteteve të Bashkuara dhe Kosovës përmes programeve të shkëmbimit arsimor.